Сенегалын Ерөнхийлөгч Макки Салл сонгууль хойшлуулснаас үүдсэн үймээн самуун, мөргөлдөөнийг зогсоохын тулд өршөөлийн хууль санаачлахаар болжээ. Хуулийн хүрээнд 2021 оноос хойш улс төрийн хэргээр баригдсан ялтнуудыг хамруулж, өршөөх гэнэ.
Баруун Африкт орших эл улсад энэ сарын 25-нд буюу өнгөрсөн ням гарагт Ерөнхийлөгчийн сонгуулийн санал хураалт болох ёстой байсан ч Макки Салл тодорхойгүй шалтгаанаар гэнэт хойшлуулсан юм. Тэрбээр санал хураах дараагийн өдрийн нэг их хол биш товлоно /Өөрийнх нь бүрэн эрх ирэх дөрөвдүгээр сарын 2-нд дуусна/ гэж амалсан ч улс төрийн хүчнүүд болон ард иргэд дургүйцэн хүлээн авч, сүүлийн хэдэн арван жилд тохиогоогүй тогтворгүй байдал үүсгээд буй.
Макки Салл “Өршөөлийн хууль”-ийн талаарх мэдэгдэлдээ “Үндэсний эвлэрлийн төлөө 2021-2024 оны хооронд улс төрийн жагсаал цуглааны хэргээр баригдсан бүх хүнийг суллах хууль санаачилна” хэмээн онцолжээ.
