Өвөрхангай аймгийн Сант суманд тавдугаар сарын 15-16-нд шилжих шөнө АН-ын ухуулагчийн аминд хүрсэн хэрэг гарсан. Гэмт хэрэг үйлдсэн П.Отгонбаатар нь УИХ–ын нэгдүгээр тойрогт МАН-аас нэр дэвшигч Г.Сайханбаярын сонгуулийн штабтай гэрээ байгуулан ухуулагчаар ажиллаж байсан учраас нэр дэвшигч Г.Сайханбаярыг эргүүлэн татах шийдвэрийг нам нь гаргасан.
Энэ бол МАН-аас гаргаж буй улс төрийн шийдвэр. Харин Сонгуулийн тухай хуульд зааснаар нэр дэвшигч Г.Сайханбаярыг эргүүлэн татах боломжгүй бас саналын хуудаснаас нэрийг нь авах хуулийн зохицуулалт байхгүй аж.
Энэ талаар СЕХ-оос тодруулахад “Нам нь нэр дэвшигчээ татна гээд зарласан учраас нэр дэвшигч сонгуулийн кампанит ажлаа зогсооно гэсэн үг. Тэр хүний нэр саналын хуудаст бичигддэгээрээ бичигдэнэ. Хэрвээ энэ хүн сонгогдох түвшинд санал авбал нам нь энэ хүнээ эргүүлэн татах шийдвэр гаргах, эсвэл өөрөө татгалзана” гэсэн юм.
Сонгуулийн тухай хуульд зааснаар нэр дэвшигч нэр дэвшигчийн үнэмлэхээ авснаас хойш эргүүлэн татах боломжгүй гэсэн заасан. Тодруулбал, 32.13.Нэр дэвшигчээр бүртгэх тухай шийдвэр гарснаас хойш нэр дэвшигчээс татгалзахыг хориглоно гэж заасан. Тиймээс МАН улс төрийн шийдвэр гаргасан ч Г.Сайханбаяр нэр дэвшигчийг эргүүлэн татах, саналын хуудаснаас нэрийг нь авах боломжгүй юм.
Хэрвээ нэр дэвшигч Г.Сайханбаяр сонгогдвол түүнийг хасаж, дараагийн хүн парламентын гишүүн болох аж. Тодруулбал, хангайн бүс есөн мандаттай тойрог учраас хамгийн их санал авсан 10 дахь хүн нь Г.Сайханбаяр нэр дэвшигчийн оронд парламентын гишүүн болох юм байна.
0
